Бүгүн, 18-апрелде Бишкек шаарындагы «Бриджес» отелинин конференц-залында Кыргыз Республикасынын Жогорку сотуна караштуу Сот адилеттигинин жогорку мектеби «Борбордук Азия өлкөлөрүнүн укуктук мамлекеттүүлүгүнө көмөктөшүү» GIZ Программасы менен биргеликте «Жарандык иштерди талдоо боюнча судьялар үчүн жумушчу ыкма” деген темада тренерлер үчүн тренинг өткөрүп жатат.

Саламдашуу сөздөрү менен Сот адилеттигинин жогорку мектебинин директору–Тургунбаева Раушанай Куттубаевна, жогоруда аталган Программанын Кыргызстандагы улуттук координатору — Мадалиев Рустам Каримович чыгышты.

Сот адилеттигинин жогорку мектебинин иш-аракетинде окутуучулук талантка жана лекторлордукундай өркүндөтүлгөн тажрыйбага ээ болгон жогорку квалификациялык судьяларды жана сот тутумунун кызматкерлерин тартуу менен байланышкан иштер зор мааниге ээ. Ошондуктан, окутуу методикасы боюнча актуалдуу темаларда судьяларга жана сот тутумунун кызматкерлерине тренерлер үчүн тренингдерди өткөрүү Сот адилеттигинин жогорку мектебинин Окуу планына календардык жылга ар жылдык негизде киргизилет.

Эл аралык тажрыйба алмашуу алкагында эл аралык тренер, Германия, Ганновердин Ылдыйкы Саксониянын округдук сотунун отставкадагы төрагалык кылуучу судьясы, Программанын эксперти,  -Томас Херманн чыгат.

Тренингдин программасы “реляция” жана “субсумация” сыяктуу укук нормаларын колдонуу методикасы менен тааныштырууну карайт, казустун негизинде түшүндүрүү үчүн практикалык сабактар өткөрүлөт.

Тренингдин аягында казусту талдоонун жыйынтыгы талкууланат жана сертификаттар тапшырылат.