2025-жылдын 12-августуна Жогорку соттун Төрагасынын буйругу менен бекитилген «Улуттук дем – дүйнөлүк бийиктик» уңугужолу иш планын аткаруу максатында Кыргыз Республикасынын Жогорку сотуна караштуу Сот адилеттигинин жогорку мектебинде КР Президентине караштуу Мамлекеттик тил жана тил саясаты боюнча улуттук комиссиянын Төрагасы Мелис Мураталиев менен жолугушуу өттү. Жолугушууга Сот адилеттигинин жогорку мектебинин кызматкерлери менен окутуучулары катышты. Саламдашуу сөзү менен Сот адилеттигинин жогорку мектебинин директору Эркинбек Токтомамбетов сөз сүйлөдү. Директор өз сөзүндө  эне тил-ата бабалардан калган мурас, улуттун жүзү, руханий дөөлөтү экенин баса белгиледи. «Биздин эл байыртадан бери эле сөз барктап, сөз баккан, сөздүн гүлүн терип, айта турган оюн макал-лакаптар менен жеткирген эл болгон. Эне тил-ата бабалардан калган мурас, улуттун жүзү, руханий дөөлөтү. Биздин ата-бабаларыбыз кыйын замандарда да тилин жоготпой, муундан-муунга өткөрүп сактап келген. Эне тилди коргоонун жана өнүктүрүүнүн жападан жалгыз жолу — аны турмуштун бардык тармактарында кеңири колдонуу болуп саналат. Биз ошол мурасты улап, үй-бүлөдө, иштеген ишибизде кыргыз тилин колдонууга, кыргыз тилинин  кадыр-баркын көтөрүүгө  ар бирибиз   милдеттүүбүз деп эсептейм», — деди директор. Ошондой эле директор Сот адилеттигинин жогорку мектебинде мамлекеттик тилди пайдаланууда жана өнүктүрүүдө жигердүү иш алып барып жатканын билдирди. Туруктуу негизде судьяларга жана сот аппаратынын кызматкерлерине чечендик өнөр, кыргыз тилиндеги юридикалык терминдер боюнча семинарлар өткөрүлүп жатканын билдирди. «Уңгужол» доктринасын ишке ашырууда Сот адилеттигинин жогорку мектебинде ар кандай иш-чаралар уюштурулуп жатканын баса белгиледи. Төрага Мелис Мураталив өз сөзүндө «Улуттук дем – дүйнөлүк бийиктик» уңгужолу жана «Мамлекеттик тил корголууга эмес, колдонууга муктаж» деген темада доклад окуду. Андан сырткары, Кыргыз Республикасынын «Кыргыз Республикасынын мамлекеттик тили жөнүндө» Конституциалык мыйзамынын аткарылышын эске салды. Андан сырткары, Сот системасында, ченемдик укуктук актыларда, иш кагаздарын жүргүзүүдө мамлекеттик тилди пайдалануу, мамлекеттик жана мамлекеттик эмес уюмдардын аталышында, интернет-ресурстарда, расмий иш-чараларда жана мекемелерде  сүйлөшүүлөрдү кыргыз тилининде жүргүзүүнүн маанилүүлүгүнө токтолду. Ал кыргыз тилинин учурдагы абалына токтолуп, ар бир атуул тилибиздин өнүгүүсүнө кызыктар болушу керек экенин билдирди. «Бала бакчадан баштап мамлекеттик тилди өнүктүрүү зарыл. Окутуу көп учурда ресмий тилде өтүп, кийин бүтүрүүчүлөрдөн «Кыргыз тест» тапшыруусун талап кылабыз. Балдарыбыз өз тилибизде кенен, туура сүйлөш үчүн аларга шарт түзүп беришибиз керек. Бирок, тескерисинче балдарыбызды чет тилдерде окутканга аркет кылып, кыргыз мектептерге бербейбиз. Үйдө, коомдук жайда, жумушта, жашообузда өз тилибизди пайдалнуунуга өзүбүз кызыктар болушубуз керек. Кыргыз тилибиз мамлекеттик макамы бар тил экенин эсибизден чыгарбашыбыз зарыл. ЮНЕСКОнун расмий маалыматына ылайык дүйнөдө 6 миңден ашык тил бар, анын 95нин гана мамлекеттик тил деген макамга ээ. Ошол 95 тилдин арасында биздин кыргыз тили да бар, биз муну менен сыймыктанышыбыз керек» — деп баса белгиледи Мелис Мураталиев. Иш-чаранын жыйынтыгында катышуучулар активдүү пикир алмашып, өздөрүн кызыктырган бардык суроолорго жооп алышты. Жолугушуу жылуу жана достук маанайда  катышуучуларга жагымдуу таасир калтырып, баарлашуу кызыктуу өттү.